उद्बब बिश्वकर्मा 
काठमाडौं — नेपाल दलित संघका अध्यक्ष बिपिन रामुदामुले पेट्रोल छरेर आत्मादाह गर्न बाध्य भएका गणेश नेपालीको परिवारलाई न्याय दिलाउन आफू पार्टीगत स्वार्थभन्दा माथि उठेर निरन्तर लागिरहेको बताएका छन्।
गणेश नेपालीको आत्मादाहपछि पीडित परिवारले न्याय, राहत तथा क्षतिपूर्तिको माग गर्दै आए पनि राज्य र पीडित परिवार बीच भएको सम्झौता अनुसार न्याय नपाएको विषयमा विभिन्न दलित अधिकारकर्मी तथा संघसंस्थाले आवाज उठाउँदै आएका छन्।
यसै सन्दर्भमा अध्यक्ष रामुदामुले गणेश नेपालीको परिवारमाथि भएको पीडालाई राजनीतिक तथा पार्टीगत स्वार्थसँग जोडेर हेर्न नहुने बताए। उनले पीडित परिवारलाई न्याय दिलाउने विषय कुनै एक दल वा समूहको मात्र नभई सबैको साझा सरोकार भएकाले दलगत स्वार्थभन्दा माथि उठेर पहल गर्नुपर्नेमा जोड दिए।
“पेट्रोल छरेर आत्मादाह गर्न बाध्य भएका गणेश नेपालीको परिवारलाई न्याय दिलाउन म पार्टीगत स्वार्थभन्दा माथि उठेर निरन्तर लागिरहेको छु,” अध्यक्ष रामुदामुले भने।
पीडित परिवारले वास्तविक न्याय पाउने गरी सम्बन्धित निकायले जिम्मेवार ढंगले पहल गर्नुपर्ने बताए। गणेश नेपालीको परिवारलाई न्याय, राहत र क्षतिपूर्तिका लागि आवश्यक सबै पक्षसँग समन्वय गर्दै निरन्तर दबाब सिर्जना गरेर अघि बढ्ने उनको प्रतिबद्धता छ।
