वैदेशिक राेजगार खबर 
काठमाडौं । वैदेशिक रोजगार व्यवसायी महेश कुमार बस्नेतलाई ‘एम्बेसडर फर पिस’ (शान्तिका लागि राजदूत) सम्मान प्रदान गरिएको छ । अन्तर्राष्ट्रिय अहिंसा दिवसका अवसरमा युनिभर्सल पिस फेडेरेसन (यूपीएफ) ले शान्ति, आपसी सम्मान, समझदारी, सहकार्य र मानवीय सेवाका क्षेत्रमा योगदान पुर्याएको भन्दै बस्नेतलाई उक्त सम्मान प्रदान गरेको हो ।
ग्लोबल राइजिङ ग्रुपका अध्यक्षसमेत रहेका बस्नेत नेपाल वैदेशिक रोजगार व्यवसायी संघ (NAFEA) का प्रथम उपाध्यक्ष हुन् । उनी रोटरी क्लब अफ गोंगबुका पूर्वअध्यक्षसमेत हुन् । वैदेशिक रोजगार व्यवसायसँगै निजी क्षेत्र र सामाजिक सेवाका गतिविधिमा आबद्ध बस्नेतलाई विभिन्न क्षेत्रमा निर्वाह गरेको भूमिकाका आधारमा सम्मान गरिएको आयोजकले जनाएको छ ।
अक्टोबर २ अर्थात् महात्मा गान्धीको जन्मजयन्तीका दिन अन्तर्राष्ट्रिय अहिंसा दिवस मनाइन्छ । संयुक्त राष्ट्रसंघले अहिंसा, शान्ति, सहिष्णुता र आपसी समझदारीको संस्कृति प्रवर्द्धन गर्ने उद्देश्यले यो दिवस मनाउँदै आएको छ । यही अवसरमा यूपीएफले शान्ति र सामाजिक सहकार्यका क्षेत्रमा योगदान पुर्याउने व्यक्तिलाई ‘एम्बेसडर फर पिस’ सम्मान प्रदान गर्दै आएको छ ।
सम्मान ग्रहण गर्दै बस्नेतले उक्त सम्मानलाई व्यक्तिगत उपलब्धिभन्दा पनि आगामी दिनमा शान्ति र सामाजिक सहकार्यका क्षेत्रमा थप जिम्मेवारीका साथ काम गर्ने अवसरका रूपमा लिएको बताए । ‘शान्ति द्वन्द्व वा हिंसाको अन्त्य मात्र होइन,’ उनले भने, ‘व्यक्ति, परिवार, समुदाय र राष्ट्रबीच विश्वास, सम्मान, संवाद र सहकार्य निर्माण गर्नु पनि शान्ति स्थापनाको महत्वपूर्ण आधार हो ।’
समाजमा देखिने असमझदारी र विभाजनलाई संवाद तथा सहकार्यबाट सम्बोधन गर्नुपर्नेमा जोड दिँदै उनले व्यवसायिक क्षेत्रले पनि सामाजिक उत्तरदायित्वलाई प्राथमिकता दिनुपर्ने बताए । विशेषगरी वैदेशिक रोजगार व्यवसाय श्रमिक र उनीहरूका परिवारसँग प्रत्यक्ष जोडिने भएकाले व्यवसायिक गतिविधिसँगै श्रमिक तथा समुदायप्रतिको जिम्मेवारीलाई समेत ध्यान दिनुपर्ने उनको भनाइ छ ।
बस्नेत वैदेशिक रोजगार व्यवसायमा ग्लोबल राइजिङ ग्रुपका अध्यक्ष हुन। NAFEA को प्रथम उपाध्यक्षका रूपमा उनी वैदेशिक रोजगार व्यवसायीको संस्थागत प्रतिनिधित्वसँग जोडिएका छन् । त्यस्तै, रोटरी क्लब अफ गोंगबुका पूर्वअध्यक्षका रूपमा सामाजिक सेवाका गतिविधिमा समेत उनको संलग्नता रहँदै आएको छ । व्यवसायिक र सामाजिक क्षेत्रका यी भूमिकाबाट आफूले सिकेको अनुभवलाई आगामी दिनमा सामाजिक सहकार्यमा प्रयोग गर्ने उनले बताए ।
यूपीएफले विभिन्न धर्म, संस्कृति, राष्ट्रियता तथा पेशागत क्षेत्रका व्यक्तिलाई ‘एम्बेसडर फर पिस’ अभियानमा जोड्दै आएको छ । अभियानले शान्ति, मेलमिलाप, अन्तरधार्मिक समझदारी, सामाजिक सहकार्य र मानव सेवाका साझा मूल्यलाई प्रवर्द्धन गर्ने उद्देश्य राखेको संस्थाले जनाएको छ ।
नेपालमा पनि यूपीएफले विभिन्न क्षेत्रका व्यक्तिलाई यस अभियानअन्तर्गत सम्मान तथा जिम्मेवारी प्रदान गर्दै आएको छ । संस्थाका अनुसार अभियानमा आबद्ध व्यक्तिहरूले आ–आफ्नो क्षेत्रबाट शान्ति, सहकार्य र सामाजिक सद्भाव प्रवर्द्धनमा भूमिका निर्वाह गर्ने अपेक्षा गरिएको छ ।
बस्नेतले प्राप्त सम्मानलाई आगामी दिनमा सामाजिक उत्तरदायित्वका गतिविधिलाई थप प्रभावकारी बनाउने प्रेरणाका रूपमा लिएको बताए । आफू आबद्ध व्यवसायिक तथा सामाजिक संस्थामार्फत सेवा, सहकार्य र मानवीय गतिविधिलाई निरन्तरता दिने उनको प्रतिबद्धता छ ।
