वैदेशिक राेजगार खबर 
काठमाडौं : नेपाली कांग्रेसका जयराम थापा बागमती प्रदेशको श्रम, रोजगार तथा यातायात मन्त्रीमा नियुक्त भएका छन्। काठमाडौं क्षेत्र नम्बर ४ (ख) बाट निर्वाचित थापाले पदभार ग्रहण गर्दै आफू प्रदेशवासीको सेवामा समर्पित रहने प्रतिबद्धता जनाएका छन्।
मन्त्री थापाले श्रम तथा रोजगार क्षेत्रमा विद्यमान चुनौती समाधान गर्न विभिन्न योजना अघि सारेका छन्। बेरोजगारी घटाउने र युवालाई आत्मनिर्भर बनाउने उद्देश्यसहित सीप विकास तथा तालिम कार्यक्रम सञ्चालन गर्ने तयारी भइरहेको उनले बताएका छन्। प्रदेशभित्रै रोजगारीका अवसर सिर्जना गर्नु पनि उनको प्राथमिकतामा पर्न आएको छ।
यातायात क्षेत्रलाई व्यवस्थित, सुरक्षित र जनमुखी बनाउनेतर्फ समेत उनले ध्यान दिने बताए। सार्वजनिक यातायात सहज बनाउने, ट्राफिक सुधार गर्ने तथा भ्रष्टाचार नियन्त्रण गर्ने दिशामा प्रभावकारी कदम चालिने मन्त्री थापाको भनाइ छ।
जनताको गुनासो सुनिने र छिटो सम्बोधन हुने व्यवस्था मिलाउने, सेवा प्रवाह पारदर्शी र सरल बनाउने लक्ष्यसहित उनले आफ्नो कार्यकाल अघि बढाउने बताएका छन्।
